کیا چاند سے دیوارِ چین نظر آتی ہے؟

کیا چاند سے دیوارِ چین نظر آتی ہے؟ دیوارِ چین انسانی آنکھ سے خلا سے نظر نہیں آتی۔ انٹرنیشنل سپیس سٹیشن سے 24 نومبر 2004 کو 180 ملی میٹر لینز کے ڈیجیٹل کیمرا سے تصویر لی گئی تھی۔ یہ تصویر زمین سے تقریباً 500 کلومیٹر اوپر خلا سے لی گئی تھی۔ اس میں صاف طور پر دیوارِ چین نظر نہیں آ رہی ہے؟ آسانی کے لئے بتا دوں کہ تصویر میں موجود سرخ اور پیلے رنگ کے تیر کے نشانات دیوار چین کی جگہ کی نشاندہی کر رہے ہیں۔ کیا اس دیوار کے گرد پہاڑوں میں یہ آپکو نشانات کے باوجود واضح نظر آ رہی ہے؟ یہ حال ہے کہ خلا میں محض 500 کلومیٹر اوپر اور وہ بھی کیمرے کی مدد سے تصویر کا، تو اندازہ کیجئے چاند جو زمین سے اوسط 3 لاکھ 84 ہزار کلومیٹر دور ہے، وہاں سے دیوارِ چین کیا خاک نظر آنی ہے؟ دیوار ِ چین اُسی مٹی اور پتھروں سے بنی ہے جو اسکے قریب پہاڑوں میں ہے سو اسکا رنگ انہی پہاڑوں جیسا ہے۔ آپ خلا سے اسے ان پہاڑوں میں دیکھیں گے تو کچھ نظر نہیں آئے گا۔ ایک اور غلط فہمی بھی دور کرتا جاؤں۔ آواز خلا میں سنائی نہیں دیتی۔ آواز کو ایک جگہ سے دوسری جگہ پہنچنے کے لیے میڈیم جیسے کہ ہوا یا گیسوں کی موجودگی کا ہونا درکار ہے۔ زمین پر ہم آوازیں اس لیے بغیر کسی مسئلے کے سُن سکتے ہیں کیونکہ زمین پر ہوا ہے اور آواز کی لہریں ہوا میں تیرتی آپکے کانوں تک پہنچتی ہیں جسے آپ سُن سکتے ہیں۔ چاند پر کوئی ہوا نہیں ہے۔ چاند پر کوئی آواز سنائی نہیں دے گی نہ ہی وہاں کسی کی ڈیوٹی لگی ہوئی ہے کہ لاؤڈ سپیکر پر آواز نکالے۔ نیل آرمسٹرانگ جو چاند پر پہلا شخص تھا اُس نے وہاں کوئی آواز نہیں سُنی تھی