سورج گرہن اور اس کی اقسام

سورج گرہن اور اس کی اقسام (Solar Eclipse & its Types) چاند اپنے مخصوص مدار میں زمین کے گرد گردش کے دوران جب سورج اور زمین کے درمیان آجاتا ہے تو سورج کی روشنی مکمل طور پر زمین تک نہیں پہنچ پاتی، بلکہ زمین پر اس جگہ چاند کا سایہ پڑتا ہے، یہ فلکیاتی عمل سورج گرہن کہلاتا ہے۔ سورج گرہن سال میں 2 بار (تقریباً 6 ماہ کے وقفے سے) ہوتا ہے، مگر ضروری نہیں کہ یہ بیک وقت زمین کے ہر حصے میں ہو یا ہر حصے سے نظر آئے، بلکہ اس کی جگہ اور وقت ہر بار مختلف ہوتا ہے۔سورج گرہن کی مندرجہ ذیل 3 اقسام ہیں: مکمل سورج گرہن (Total Solar Eclipse) چاند جب حرکت کرتا ہوا اس طرح زمین اور سورج کے درمیان آجاتا ہے کہ وہ (زمین سے دیکھنے والوں کے لیے) سورج کو مکمل طور پر اپنے پیچھے چھپا لیتا ہے، اس طرح سورج کی روشنی کی جگہ چاند کا سایہ زمین پر پڑتا ہے، اس حالت کو مکمل سورج گرہن کہتے ہیں۔ حلقہ دار/چھلہ دار سورج گرہن Annular Solar Eclipse سورج اور چاند زمین سے دیکھنے پر جسامت میں تقریباً ایک جیسے دکھائی دیتے ہیں، کیونکہ سورج جتنا بڑا ہے اتنا ہی زمین سے زیادہ دُور بھی ہے۔ اسی طرح چاند کا مدار بھی زمین کے گرد تقریباً بیضوی ہے اس لیے اس کا فاصلہ بھی زمین سے کم/زیادہ ہوتا رہتا ہے۔ اس لیے جب کبھی چاند ایسے وقت میں سورج اور زمین کے درمیان آجاتا ہے جب وہ زمین سے اوسطاً زیادہ فاصلے پر ہوتا ہے تو وہ (زمین سے دیکھنے پر) سورج کو مکمل طور پر نہیں چھُپا پاتا، بلکہ سورج کناروں سے نظر آتا رہتا ہے، ایسی صورت میں یہ زمین سے دیکھنے پر حلقہ نما/چھلہ نما یا آگ کے گولے کی طرح دکھائی دیتا ہے، اس لیے اسے حلقہ دار/چھلہ دار سورج گرہن کہتے ہیں۔ جُزوی سورج گرہن (Partial Solar Eclipse) بعض اوقات چاند حرکت کرتا ہوا مکمل طور پر سورج اور زمین کے درمیان نہیں آتا بلکہ اس کا کچھ حصہ سورج کے سامنے ہوتا ہے، جس سے وہ سورج کے جزوی حصے کو (زمین سے دیکھنے پر) اپنے پیچھے چھپا لیتا ہے، اس حالت کو جزوی سورج گرہن کہتے ہیں