گنگا چوٹی باغ آزاد کشمیر

گنگا چوٹی ریاست جموں و کشمیر کے ضلع باغ اور ضلع جہلم ویلی کے سنگم پر واقع ہے جبکہ اس کا باغ شہر سے ہوائی فاصلہ 8کلومیٹر کے لگ بھک ہے۔سطح سمندر سے اس کی بلندی 9989فٹ ہے ۔کوہ ہمالیہ کی سب سے مشہور اور خوبصورت پہاڑی سلسلے پیر پنجال رینج جو کہ نیپال سے شروع ہو کربھارتی ریاست ہماچل پردیش سے ہوتا ہوا دریائے نیلم کے دہانے پر ختم ہوتا ہے اور ریاست جموں و کشمیر کے سب سے خوبصورت سیاحتی مقامات گلمرگ اور پہلگام بھی اسی پہاڑی سلسلے میں واقع ہیں ۔گنگا چوٹی پیر پنجال کی شمالی مغربی آخری پہاڑی چوٹی ہے ۔اس کے نظارے بہت دلکش ہیں ۔پاکستان کے صوبے خیبر پختونخوا اور شمالی پنجاب کے بہت سارے علاقوں سے اسے باآسانی سے دیکھا جا سکتا ہے ۔ویسے پیر پنجال کے پہاڑی سلسلے کو پنجاب کے بہت سارے علاقوں سے بھی دیکھا جا سکتا ہے ،منڈی بہاوالدین سے بھی نظر آنے والا یہ سلسلہ دنیا کا خوبصورت ترین علاقہ شمار کیا جاتا ہے ۔گنگا چوٹی کا شمالی حصہ ریاست کشمیر اور جنوبی حصہ ریاست پونچھ میں شامل ہے ۔موجودہ انتظامی تقسیم کے حوالے سے یوں کہا جائے کہ ضلع جہلم ویلی اور ضلع باغ کے عین سنگم پر واقع یہ چوٹی نظاروں کے حوالے سے بھی اپنی مثال آپ ہے۔ گنگا چوٹی کی سیر کرنے کے لیے کم وقت اور آسان راستے ہیں ۔باغ شہر سے بذریعہ سڑک صرف 31 کلو میٹر کا فاصلہ ہے