اَج سِک متراں دی ودھیری اے کیوں دِلڑی اُداس گھنیری اے
اَج سِک متراں دی ودھیری اے
کیوں دِلڑی اُداس گھنیری اے
لُوں لُوں وِچ شوق چنگیری اے
اج نیناں لائیاں کیوں جھڑیاں...!!!
مُکھ چند بدر شعشانی اے
مَتھے چَمکے لاٹ نُورانی اے
کالی زُلف تے اَکھ مَستانی اے
مَخمور اَکھیں ھِن مدھ بھریاں...!!!
دو اَبرو قوس مثال دِسَن
جیں توں نوک مژہ دے تیر چھٹن
لباں سرخ آکھاں کہ لعل یمن
چِٹے دند موتی دیاں ھِن لڑیاں...!!!
اِس صُورت نُوں میں جان آکھاں
جانان کہ جانِ جہان آکھاں ؟؟
سچ آکھاں تے رَب دی شان آکھاں
جِس شان تو شاناں سب بنڑیاں...!!!
ایہا صُورت شالا پیش نظر
رھے وقت نزع تے روزِ حشر
وِچ قبر تے پل تھیں جد ھوسی گذر
سب کھوٹیاں تھی سَن تَد کھریاں...!!!
انہاں سِکدیاں تے کُرلاندیاں تے
لکھ واری صَدقے جاندیاں تے
انہاں بردیاں مفت وکاندیاں تے
شالا آون وت وی اوھ گھڑیاں....!!!
سُبْحَانَ اللہ مَا اجْمَلَکَ
مَا اَحْسَنَکَ مَا اَکمَلَکَ
کِتھے مہر علی ، کِتھے تیری ثنا
گستاخ اکھیاں کتھے جا اَڑیاں...!!!
صلی اللہ علی حبیبہ محمد وآلہ وسلم
”پیرحضرت سید مہر علیؔ شاہ“ رحمتہ اللہ علیہ"
گولڑہ شریف"
